Toyota кетма-кет тўртинчи марта автомобиллар сотуви бўйича жаҳонда етакчи бўлди

Япониянинг Toyota Motor Corp. концерни автомобиллар сотуви бўйича кетма-кет тўртинчи марта  жаҳон биринчилигини эгаллади.

2015 йилда Toyota ўз бўлимлари Hino ва Daihatsu билан биргаликда 10,15 млн машина сотган (0,8 фоизлик камайиш).

2015 йилнинг биринчи ярим йиллиги натижалари бўйича япониялик рақобатчисидан ўтиб кетган Германиянинг Volkswagen AG автоконцерни эса бу давр ичида 9,9 миллион автомобиль сотган (2 фоизлик камайиш).

2015 йилнинг сентябрида юзага келган «дизель можароси»дан кейин Volkswagen 11 миллион автомобилини чақириб олишга мажбур бўлди.

Америкаликларнинг General Motors концерни эса ўтган йилда 9,8 млн автомобил сотган (0,2 фоизлик ўсиш).

Бундан олдинроқ Toyota компаниясининг Toyota Corolla автомобили 2015 йилда дунёдаги энг харидоргир автомобил бўлгани ҳақида хабар берилганди.

Бундан ташқари японияликлар ўтган йилда бир қатор янги моделлар, жумладан, янгиланган Prius автомобилини чиқарди. Бу эса унга сотув ҳажмини кўпайтириш имконини берди.