Тожикистон цемент экспорт қилишни бошлади

Тожикистон илк бор ўзининг янги тарихида цемент экспорт қилишни бошлади. 2015 йилда Афғонистоннинг “Шимол-Шарқ” компанияси томонидан 500 тонна тожик цементи экспорт қилинди. Бу ҳақда журналистларга Тожикистон саноат ва янги технологиялар вазири Шавкат Бобозода маълум қилди.

Бобозоданинг айтишича, 2015 йилда мамлакатда 1,4 млн тонна цемент ишлаб чиқарилган. Хусусан, умумий цементнинг 77 фоизи “Хуаксин Гаюр Цемент” тожик-хитой қўшма корхонаси, 16 фоизи “Тожикцемент” компанияси, қолгани эса бошқа 6 та корхона томонидан ишлаб чиқарилган.

Шу билан бирга, Тожикистоннинг цементга эҳтиёжи 2 млн тоннани ташкил қилмоқда.

Бобозоданинг таъкидлашича, 2016 йилда цемент ишлаб чиқарувчи яна 3 та корхонани фойдаланишга топшириш режалаштирилмоқда.

Бобозоданинг айтишича, республикада цементни асосий экспорт маҳсулотларидан бирига айлантириш учун барча имкониятлар мавжуд.