Песков: Путин 2018 йилги президентлик сайловида иштирок этиш бўйича ҳали бир қарорга келмади

Россия президенти Владимир Путин 2018 йилда бўлиб ўтадиган мамлакат президентлиги учун сайловларда ўз номзодини қўйиш бўйича бир қарорга келгани йўқ. Бу ҳақда мамлакат раҳбари матбуот котиби Дмитрий Песков ТАСС ахборот агентлигига маълум қилган.

Унинг сўзларига кўра, «ҳозирча бу ҳақида гапиришга эрта».

«Икки йил олдиндан сайловлар ҳақида гапириш бизда яхши қабул қилинмайди. Ҳаттоки Путин сайловларда иштирок этишни режалаштираётган, ёки аксинча бўлса ҳам ҳар эҳтимолга қарши бундай туҳмат ёғдирувчи кампаниялар бошланган», — деди Песков Вашингтондаги Путин номига билдирилган айбловларга ишора қилиб.

«Ҳозирча бу борада қандайдир қарор қабул қилиш шарт эмас. Сабаби сайловларгача ҳали анчагина муддат бор», дея гапириб ўтди Кремль вакили.