«Реал» Мессини ўз таркибига қўшиб олиш учун 3 марта ҳаракат қилгани аён бўлди

Мадриднинг «Реал» клуби президенти Флорентино Перес сўнгги бир неча йил ичида «Барселона» ҳужумчиси Лионель Мессини 3 марта қўлга киритишга уриниб кўргани маълум бўлди.

Cadena COPE тарқатган маълумотга кўра, «қаймоқранглилар» 2011 йилда илк марта аргентиналик футболчига таклиф юборишган. Ўшанда «Реал» етакчиси Криштиану Роналду жамоани тарк этиш хавфи юзага келганди.

2013 йилда «Реал» раҳбарияти иккинчи марта «Барселона»га таклиф билан чиқишган. Перес каталонияликлар раҳбарияти билан учрашув ўтказган, аммо яна ўз мақсадига эриша олмаган.

Мессининг трансфери юзасидан сўнгги музокара бундан 1 йил аввал ўтказилган, аммо қисқа ва лўнда жавоб олган: "Раҳмат, аммо йўқ!".

Шундан сўнг Перес Неймар вариантига ўз эътиборини қаратди.

Месси «Барселона» академияси тарбияланувчиси ҳисобланади. У асосий жамоа сафида 17 ёшида илк марта майдонга тушган. Жорий мавсумда жароҳатлар туфайли бир қанча ўйинларда қатнаша олмаган бўлсада, 15та ўйинда 11та гол уриб, 4 марта голли узатма муаллифи бўлган.