Lamborghini компанияси ўзининг энг тезкор Huracan моделини синовдан ўтказишни бошлади

Lamborghini компанияси Huracan суперкарининг янги модификациясини синовдан ўтказишни бошлади. Бу машина Superleggera ёки SV (SuperVeloce) деб аталади. Синовдан ўтказилаётган моделнинг прототипи суратлари Car британ нашрида чоп этилди.

Машинага қўшимча прожекторлар ва кузовнинг орқа қисмида антиқа элементлар ўрнатилган. Бу элементлар марказда жойлашган чиқариш тизимининг патрубкаларини яширади.

Янги машина кучайтирилган 5,2 литрли атмофсерали V10 двигатели билан жиҳозланади, у 7 поғонали, икки илашишли “робот” шаклидаги узатмалар қутиси билан биргаликда ишлайди. Бундан ташқари, суперкар енгиллаштирилган конструкция олади.

Оғирлиги 1422 килограммни ташкил қилувчи стандарт Huracan модели 2013 йилнинг охирида намойиш қилинган. Тўлиқ приводли купе 610 от кучига эга 10 цилиндрли двигатель билан жиҳозланган. Бу двигатель икки эшикли машинага 0 дан 100 км/соат тезликка 3,2 сонияда эришишга имкон берган. Машинанинг максимал тезлиги 325 км/соатни ташкил қилади.

2015 йилда моделнинг усти очиқ Spyder ҳамда орқа приводли LP 580-2 модификацияси ишлаб чиқарилганди.