Россиялик миллиардер суперяхтасини "кичиклик қилгани" учун сотиб юборган

Лондонда истиқомат қилувчи россиялик миллиардер Кирилл Писарев ўзига тегишли яхтани "6 кишидан иборат оиласи учун кичиклик қилгани" учун 2012 йилда 21,7 млн долларга сотиб юборгани маълум бўлди. Бу ҳақда The Daily Mail нашри хабар бермоқда.

Таъкидланишича, 47 метрлик яхта "12 киши учун барча шинам қулайликларга, тренажёр зали, жакузи ва Wi-Fi’га эга бўлган". 

Бу яхтани 2010 йилда сотиб олган тадбиркор 6 ой ўтибоқ ундан кўнгли қолган ва унга яхтани сотишда ёрдам берган воситачиларга яхта у, унинг рақифаси ва 4 фарзанди учун кичиклик қилаётганини айтган. Писарев уни 2012 йилда бошқа рус олигархи Александр Милявскийга 21,7 млн долларга сотиб юборган ва 29 млн долларга ўзига бошқа, 55 метрлик яхта сотиб олган.

Нашр маълумотларига кўра, яхтанинг сотилиши бўйича Лондон апелляцион судида Moran Yacht and Ship Inc брокерларининг миллиардерга қарши даъво аризаси кўриб чиқилмоқда. Яхтанинг сотилишида ёрдам берган брокерларнинг таъкидлашларича, миллиардер уларга яхта сотилиши учун 900 минг доллар миқдорида воситачилик пулини бермаган.

Кирилл Писарев 1994 йилда ўзининг ҳамкори Юрий Жуков билан "ПИК" девелоперлик компаниясини ташкил этган.

\