Тошкент кинотеатрлари “Дэдпул” фильмини кўрсатишдан воз кечди

Тошкентнинг 5 йирик кинотеатри Тим Миллернинг “Дэдпул” фантастик жангари фильмини намойиш этишдан бош тортди, деб хабар беради Sputnik агентлиги.

“X одамлар” силсиласига оид фильм премьераси 9 февраль куни бўлиб ўтди. “Дэдпул” сериядаги R рейтингига эга ягона фильм бўлди, яъни унда 18дан ошмаганлар кўриши мумкин бўлмаган саҳналар мавжуд. Тошкент кинотеатрлари айнан шу сабабдан уни намойиш этмаётгани айтилмоқда.

“Дэдпул” бизда кўрсатилмайди, негаки у ёш чекловларига эга ва жамиятимиздаги одоб-ахлоқ меъёрларига мос келмайди”, - деди MegaCinema кинотеатри менежери.

“Ўзбеккино” давлат агентлиги, ўз навбатида, фильм прокати ҳақидаги қарор фақат кинотеатр томонидан қабул қилинишини таъкидлаб ўтди.