Нью-Йоркдаги аукционда 300 та ноёб гитара сотилди

Guernsey's аукцион уйи 27 февралда Нью-Йоркда 300 та ноёб гитара савдосини ўтказди. Аукцион натижаларига кўра 1,34 млн доллар олинди. Баъзи гитаралар кутилганидан камроқ нархга сотилди.

Савдоларнинг етакчи лоти блюз ижрочи Жонни Винтер учун махсус яратилган гитара бўлди. White Lazer деб номланган гитарани сотувга мусиқачининг яқинлари қўйишган. Гитара 180 минг долларга сотилди. Бу нарх аукцион уйи унга олмоқчи бўлган қийматдан 2 баробар камроқни ташкил қилди.

95 минг долларга режиссёр Ричард Брукснинг фильмларидан бири билан боғлиқ бўлган иккита гитара сотилди. Бу лот аукциончилар кутгандан аъло нархга сотилди.

1980-йилларда америкалик мусиқачи Эдди Ван Хален учун махсус яратилган Charvel гитараси 67 минг долларга сотилди. Унга қўшимча равишда гитара айнан мусиқачи томонидан харид қилинганини тасдиқловчи чек ҳам қўшиб берилди.

Британиялик машҳур рок-мусиқачи Эрик Клэптон томонидан имзоланган Fender Stratocaster маркасидаги гитара 4 минг долларга сотилди.
Бироқ аукцион олдидан энг қиммат нархга кетиши кутилган гитаралардан бири Gibson Super 400 CES гитараси ўз харидорини топа олмади. Бу гитара 1952 йилда мусиқачи Тони Моттола учун махсус яратилган. Гитаранинг нархи 100 минг долларга баҳоланган эди.

Шунингдек, аукционга қўйилган гитаралар орасида 1800-йилларда ясалганлари ҳам бўлган. Бу гитаралардан аскарияти АҚШда машҳур бўлган мусиқачилар ва санъат шайдолари шахсий коллекцияларида сақланган.