Словениялик скейтбордчи электр скейтбордда тезлик рекордини ўрнатди

Скейтбордчи Мишо Эрбан электр скейтбордда 95,83 км/соат тезлик билан ҳаракатланиб, бундай турдаги ҳаракатланиш воситаларида тезлик бўйича жаҳон рекордини ўрнатди. Унинг бу натижаси Гиннесс рекордлар китобига киритилди.

Спортчи бу ютуққа эришиш учун Словениянинг Next Generation Vehicles стартапи томонидан яратилган скейтборддан фойдаланди. Скейтборд икки йил давомида ясалган. У ҳар бир ғилдиракка ўрнатилган 4та электромотор ва икки комплект батареялар билан жиҳозланган. Батареялар қайта қувватлашсиз 10-15 км йўл босишга имкон беради. Аккумуляторларни тўлиқ қувватлаш учун 1,5 соат вақт талаб этилади. Скейтборд симсиз бошқарув пульти ёрдамида бошқарилади.

Рекорд Словениянинг Пиран шаҳридаги аэродром ҳудудида ўрнатилди. Электр скейтборд яратувчиларининг айтишича, келажакда бундай скейтбордларнинг махсус пойга сериясига асос солиш режалаштирилмоқда.

Эрбан аввал ҳам Гиннесс рекордини ўрнатганди. 2012 йилда у скейтбордда тоғдан пастга қараб ҳаракатланиш бўйича тезлик рекордини ўрнатган. Ўшанда спортчи 129,94 км/соат тезликка эриша олганди.