Соҳиб Аббосхон маст бўлиб, ДАН ходими билан баҳслашганмиди?

Соҳиб Аббосхон. Уни илк бор томошабинлар “Занжир” сериалидаги роли орқали таниган. Актёр, режиссёр, продюссер сифатида ўзбек кино оламида ўзига хос ном қозонган серқирра ижодкор Kun.uz сайтига интервью берди. Мавзу кино ва ижод ҳақида бўлди.

-Ўзбек кино санъати тез суръатларда ривожланиб бораётган сохалардан бири, десак адашмаган бўламиз. У ердаги ҳар бир жараён томошабиннинг, халқимизнинг эътиборидан четда қолмайди. Фильмлар жуда кўп ва хўп муҳокама қилинади. Сабабини қандай изоҳлайсиз?

Соҳиб Аббосхон: Бу биринчи навбатда бу халқимизнинг санъатни, кинонини яхши кўришидан. Тинчлик-хотиржамликдаги ҳаётда юракка кино сиғаётганидан. Ҳаммамиз яхши, сифатли, томошабоп, одамга маънавий озуқа берадиган фильм томоша қилишни истаймиз. Муҳокамаларнинг сабаби ҳам шу истак билан боғланади. Бундан фақат хурсанд бўлишимиз керак. Ўз навбатида, бу биз ижодкорлардан яна ҳам кўп ишлашни, масъулиятни теран ҳис қилишни талаб этади.

-Болливуд киноларига эътибор берсак, мавзулар деярли бир-хил: муҳаббат, севги учбурчаги. Кадрлар, образлар, ҳатто қўшиқлар ҳам такрор бўлиши кузатилади. Бу мавзулар тугаб қолганидан даракми?

Соҳиб Аббосхон: Станиславскийнинг бир гапи: “Мавзу битта. Бу ҳам бўлса—ҳаёт!” Ҳамма нарса шу ҳаётнинг атрофида қурилади. Фақат ҳамма ҳар хил томнидан кўради. Ўхшашлиги шундан бўлса керак. “Ўзим ўйлаб топдим, ўзим қилдим”, деганингиз билан қаердадир шунга ўхшаш асар ёки воқеа содир бўлган бўлиши ҳам мумкин. Бундай тасодифий ўхшашлик нафақат кино, балки қўшиқчилар, адиб ва шоирлар, хатто ихтирочилар орасида ҳам кўплаб топилади.

-Жаҳонгир Аҳмедовнинг “Тилим қурсин-2” фильмида ичиб олиб, ДАН ходимига рост гапирган одам эпизодик ролини ўйнагансиз. Сизни жиддий ва катта образларда кўриб ўрганганмиз...

Соҳиб Аббосхон: Ўзи, аслида, комик жанрдаги образларни яратишга қизиқиш кучли. Бир неча йилдан буён Жаҳонгир Аҳмедовга айтардим: мени ичимдаги комик образни уйғотинг, деб. “Тилим қурсин-2” фильмида шу эпизодга чақирди. Мен эса бажону дил ижро этдим. Фильмнинг айнан шу қисми интернетда тарқагач, одамлар буни ҳақиқий, деб ўйлашибди. Демак, Жаҳонгир менинг яна бир қиррамни оча олди.

-Устозингиз Рустам Саъдиевнинг “Барон” фильмидаги Фарҳод Маҳмудов ўйнаган ролга вариантлар орасида Соҳиб Аббосхон биринчи ўринда. Бу менинг вариантим, албатта...

Соҳиб Аббосхон: Менинг ҳам вариантим шундай эди. Тўғриси, “Мен ўйнаганимда яхши бўларди”, деган оний фикр ўтганди. Лекин мен фильмда Фарҳод Маҳмудовнинг ижросини кўриб, Рустам Саъдиевнинг қарори мутлақо тўғри эканига англадим. Образни актёр жуда мукаммал ижро этган.

-Соҳиб Аббосхон нега кино олмаяпти? Дангасаликнинг сабаби нима?

Соҳиб Аббосхон: Дангасалик эмас, турғунлик. Сабаби бор: юракни жизиллатадиган асарлар келмаяпти. Хаёлда шундай ғояларим йўқ. Мен бу йил камида иккита фильм олишим шарт, деб мақсад қўя олмайман. Яхши, савияли, маънавий озуқа берадиган фильмлар олишни истайман.

Суҳбатнинг давомини қуйида томоша қилишингиз мумкин.

Қизиқарли суҳбатни тайёрлашда ёрдам берган бошловчи Акмал Мирзо ва “Салом-Медиа” ижодий гуруҳига миннатдорлик билдирамиз.