Януковичнинг вертолёти кимошди савдосига қўйилди

Украина президенти Виктор Янукович "Межигорье" қароргоҳидан Киев марказидаги иш жойига учиб келишда фойдаланган Agusta AW139 русумли вертолёт савдога қўйилганини халқаро авиаброкерлар сайтларида эълон қилинган маълумотлар тасдиқламоқда.

Уни сотиш билан Швейцарияда рўйхатдан ўтган Sparfell & Partners ҳамда Американинг SkyQuest International фирмалари шуғулланмоқда. Ҳозирча учар техниканинг нархи эълон қилинмаган. 

Sparfell & Partners фирмаси сайтида вертолётга оид барча техник тавсифлар тўлиқ келтирилган. Хусусан, интерьер тавсифига кўра, салон 6 кишига мўлжалланган, иккита чарм ўриндиғи VVIP (very very important person, «жуда жуда муҳим шахс») тўпламида жиҳозланган, унда сенсор экранли кўнгилочар маркази мавжуд, CD, DVD, сунъий йўлдош радиоси, саккизта овозкучайтиргич, 2та 15-дюймли монитор ва шахсий буюртма асосида ишлаб чиқилган дам олиш бурчаги. Иккита иқлим назорати ҳудуди, сунъий йўлдош телефони ҳам эътибордан четда қолмаган. Шу билан бирга, салон шовқинни ўтказмасликни ҳисобга олган ҳолда тайёрланган. 
VIP тўпламли Agusta AW139 вертолёти 2008 йили ишлаб чиқилган. 2010 йилдан Украинанинг «Центравиа» МЧЖ рўйхатида турган. У, ўз навбатида, Мэн оролида рўйхатдан ўтган Aero Holdings компаниясининг шўъба корхонаси ҳисобланади. 

2014 йил июль ойларида UR-CRB борт рақамли вертолёт Украина рўйхатидан чиқарилиб, Мэн оролида M-OLJM рақами остида рўйхатга қўйилиб, оролнинг 2014 йил апрели бошида ташкил этилган яна бир фирмаси Boutique Aviation Limited ихтиёрига берилган. Boutique Aviation ва Aero Holdings манзили бир хил экани унинг иккисини ҳам Wilton (IOM) Ltd компанияси бошқаришини англатади.

2014 йил июль ойида Украина давлат ишлари бошқармаси раҳбари Сергей Березенко собиқ давлат раҳбари Янукович фойдаланган Augusta вертолётининг йўқолгани ҳақида маълум қилган эди. 

«Янукович йўқолгач, вертолёт ҳам ғойиб бўлди», — дея Березенко сўзларини келтирган эди «112 Украина» телеканали. 

Янукович Украина президенти бўлган вақтларда, президент ишлари бошқармаси вертолётни «Центравиа»дан йилига 7,5 млн гривень (915 минг АҚШ доллари) ҳисобига ижарага олган.