Мейфэр баронессаси, илғор жамоатчи ва ички кийимлар ишлаб чиқариш билан шуғулланувчи Ultimo бренди асосчиси Мишель Моне 22 ёшли вьетнамлик йигитни кичкина бола деб адаштирди. Бу ҳақида The Mirror нашри хабар беради.
У Вьетнамдаги тадбиркорлар конференциясида қизиқ ҳолатга тушди. Унинг уч минг тингловчи олдида сўзлаган нутқидан кейин саҳнага қўлида гулдаста билан Тэн Фат Нгуен исмли вьетнамлик чиқиб келди.
Баронесса уни олти ёшли болакай деб ўйлаб уни бирга суратга тушиш учун қўлига кўтариб олди.
Бир қатор нашрларда биринчи қаторда ўтирган номаълум аёл уни дарҳол ерга қўйишни талаб қилгани ҳамда у аёл йигитнинг турмуш ўртоғи эканлиги ҳақида хабар беришган. Шу вақтда залда кулги кўтарилган.
Бироз муддатдан сўнг баронесса ўз твиттерида бу воқеадан жуда мулзам бўлганини билдирди.
Нгуен - кўчмас мулк бўйича агент сифатида хизмат қилади. У конференцияда рўй берган ҳолатни тасдиқлади, бироқ унинг турмуш ўртоғи йўқлигини таъкидлади. Монени эса ўзининг кумири дея атади.
