Рогозин: Тожикистон билан виза тартиби эмас, миграцион тартиб керак

Россия бош вазири ўринбосари Дмитрий Рогозиннинг фикрича, Тожикистон билан виза тартибини киритиш давлатлар ўртасидаги муносабатларни мураккаблаштириши мумкин, бироқ миграцион сиёсатда тартиб ўрнатиш керак. 

Аввалроқ Тожикистон ва Ўзбекистон фуқароларига нисбатан виза киритиш зарурлигини Россия Федерация кенгашининг мудофаа ва хавфсизлик қўмитаси раиси биринчи ўринбосари Евгений Серебренников маълум қилганди. 

14 майда Москванинг энг йирик қабристони бўлган Хованда 200 киши иштирок этган муштлашув бўлиб ўтганди. Оқибатда 3 киши ҳалок бўлган, 30 га яқин киши жароҳат олганди. Россия Тергов қўмитаси қотиллик ҳолати бўйича жиноий иш қўзғатди. Дастлабки маълумотларга кўра, муштлашув қабристонда хизмат кўрсатиш ҳудудини бўлишиш сабабли келиб чиққан. Муштлашувда кавказликлар ва ўрта осиёликлар иштирок этган.

"Масала виза тартибини киритишда эмас, бу эса Тожикистон билан муносабатларни мураккаблаштириши мумкин, балки миграцион сиёсат масалаларида тартибни ўрнатишдан иборат", деб айтди Рогозин РИА “Новости” ахборот агентлиги саволига жавобан Душанбеда. 

Рогозиннинг фикрича, Россия-Тожикистон комиссияси доирасида Россиядаги тожик диаспораси билан биргаликдаги ишни ташкиллаштириш ҳақида келишиб олиш керак.

"Тожик диаспораси Россиясидаги йирик диаспора ва бизга у тегишли равишда ташкиллаштирилиши муҳим, фикримча, бу масалада биз Тожикистон раҳбарияти билан бир тўхтамга кела оламиз", деб айтди Рогозин.

Рогозиннинг айтишича, тожик диаспорасини ўз фуқароларини ҳимоя қила оладиган муносиб одамлар бошқариши керак. "Акс ҳолда бундай раҳбарлар ўрнига жиноий элементлар келади, биз бугун буни кўриб турибмиз. Исталган диаспора агар уни бошқармаса, шундай ҳолатга тушади. Шунинг учун ишни виза тартиби ҳақидаги бекорчи гаплардан эмас, балки диаспора билан ишлашдан бошлаш керак", деб таъкидлаб ўтди Рогозин.