New York Times: Фалокатга учраган А320 самолётида парвоз олдидан хавфсизлик чоралари кучайтирилган бўлган

19 майда Ўрта Ер денгизи устида ҳалокатга учраган, EgyptAir авиакомпаниясининг А320 самолёти бортида парвоз олдидан хавфсизлик чоралари кучайтирилгани маълум бўлди. The New York Times нашрининг маълум қилишича, MS804 рейсини хавфсизлик хизматининг 3 нафар ходими кузатиб борган, ваҳоланки лайнерга одатда икки нафар қўриқчи ҳамроҳлик қилади. Хавфсизликнинг кучайтирилиши нима билан боғлиқ бўлганини нашр манбалари тушунтира олишмаган.

Бундан ташқари, нашр самолётдаги мудҳиш ёзувнинг тафсилотларини келтириб ўтди. Бу ёзув самолёт бортида бир неча йил аввал пайдо бўлган. Таъкидланишича, бу "Мусулмон биродарлар" экстремистик гуруҳининг тарафдорлари бўлган Қоҳира аэропорти ходимларининг иши бўлган. Ёзувда "Биз бу самолётни уриб туширамиз" деб айтилган. Бу ёзув тушунарсиз сабабларга кўра ўчириб ташланмаган.  

Самолёт 19 майда эрта тонгда Париждан Қоҳирага кетаётганда радарлардан йўқолиб қолган. Самолёт бортида 66 киши бўлган. Самолётнинг фалокатга учраши сабабларидан бири сифатида теракт содир этилгани қаралмоқда. Бироқ лайнер билан аслида нима бўлгани унинг қора қутилари аниқлангандан кейин маълум бўлади. Ҳозирча улар аниқланмаган.

Самолётнинг фалокатга учраши бўйича дастлабки ҳисоботни бир ойдан кейин тақдим қилиш режалаштирилмоқда.