69-Канн кинофестивалида британияликларнинг «Мен, Дениел Блейк» фильми «Олтин пальма япроғи»ни қўлга киритди

Британиялик кинорежиссёр Кен Лоуч иккинчи марта Канн фестивалининг бош соврини - «Олтин пальма япроғи»ни қўлга киритди. У, «Мен, Даниэл Блейк» (I, Daniel Blake) номли фильми учун шундай юқори унвонга сазовор бўлди.

Лоуч кинофестивал тарихида икки марта бош совринни қўлга киритган саккизинчи кинорежиссёр бўлди. Бундан аввал, у 2008 йилда ҳам бош мукофотни қўлга киритган эди. 

Фестивал Гран-приси эса, канадалик Ксавье Доланга, унинг «Бу шунчаки қиёмат-қойим» фильми учун тақдим этилди.

Бундан ташқари, энг яхши режиссёрлик иши учун мукофотни ҳакамлар руминиялик Кристиан Мунжиу («Битирув кечаси») ва франциялик Оливье Ассаяс («Шахсий харидор»)га топширди.

Киноактёр Жан-Пьер Лео эса Канн кинофестивалининг «Фахрий пальма япроғи»га муносиб кўрилди.

Энг яхши сценарий учун мукофотни эронлик режиссёр Асгар Фарҳодийга «Коммивояжёр» фильми учун беришди. Шу фильмдаги роли учун эронлик Шаҳоб Ҳусайний энг яхши актёр, филиппинлик Жаклин Жозе эса энг яхши актриса деб эътироф этилди.

Канн кинофестивали 11 майдан 22 майга қадар ўтказилди.