АҚШ ва Вьетнам компаниялари 16 млрд доллардан кўпроқ қийматли шартномалар имзолашди 

АҚШ ва Вьетнам компаниялари 23 майда Ханойда умумий қиймати 16 млрд доллардан кўпроқ бўлган шартномалар имзолашди. Бу ҳақда Оқ уй хабарида айтилди.

"Бугун президент Обама ва Вьетнам президенти Чан Дай Куанг АҚШ ва Вьетнам компаниялари ўртасида умумий қиймати 16 млрд доллардан кўпроқни ташкил қилувчи шартномаларни имзолаш маросимида иштирок этишди. Тижорий битимлар икки давлат ўртасидаги иқтисодий муносабатларни мустаҳкамлайди", деб айтилмоқда хабарда.  

Жумладан, Boeing компанияси Вьетнамнинг VietJet 100 авиакомпаниясига 100 та самолётини сотмоқчи, Pratt & Whitney ҳам худди шу компания билан 135 та авиацион двигатель сотишга битим имзолади. GE Wind компанияси эса Вьетнамга шамол генераторларида ишлайдиган электр станцияларни яратишда ёрдам беради.

Оқ уйнинг таъкидлашича, икки давлат ўртасидаги товар айланмаси охирги 7 йил ичида 45 млрд долларга етган, АҚШнинг Вьетнам иқтисодиётига инвестициялари миқдори эса 1,5 млрд долларни ташкил қилган. 

Обама 20 йиллар аввал икки томионлама муносабатлар яхшиланганидан кейин Вьетнамга келган учинчи АҚШ президенти бўлди. Обамадан аввал АҚШ президентларидан Вьетнамга 2000 йилда Билл Клинтон, 2006 йилда эса Кичик Жорж Буш ташриф буюрган.