«Локомотив» «Ал-Ҳилол»ни енгиб, ОЧЛнинг чорак финалига чиқди

Бугун, 24 май куни ОЧЛ нимчорак финали доирасида Тошкент шаҳридаги «Бунёдкор» стадионида «Локомотив» жамоаси Саудия Арабистонининг «Ал-Ҳилол» жамоасини қабул қилди.

Бир ҳафта аввал Саудия Арабистонида бўлиб ўтган баҳс 0:0 ҳисобидаги дуранг натижа билан якунига етган эди. Тошкент вақти билан соат 18:00да бошланган баҳсда мезбонлар тўла устунлик қилишди ва жамоа чорак финалга йўл олди.

Аввалига ўйиннинг 26-дақиқасида тошкентликлар ҳимоячиси Ислом Тўхтахўжаев ҳисобни очди. 56-дақиқада эса мезбонларнинг яна бир ҳимоячиси Шерзод Файзиев ҳисобдаги устунликни оширди - 2:0.

Ўйиннинг охирги қисмида, 88-дақиқада австралиялик ҳакам Бенжамин Уильямс саудияликлар ҳужумчиси Аилтон жарима майдонида йиқилгач, 11 метрлик нуқтани кўрсатди. Муҳаммад ал-Шулҳуб жаримани аниқ амалга ошириб, ҳисобни қисқартирди, лекин қолган вақт ичида тошкентликлар жамоаси ғалабани сақлаб қолди.

Шу тариқа, «Локомотив» ўз тарихида илк марта ОЧЛнинг чорак финалида ўйнайди.

Турнирнинг биринчи чорак финалчиси бироз олдинроқ маълум бўлганди. Жанубий Кореянинг «Чонбук Моторс» жамоаси ўз майдонида Австралиянинг «Мельбурн Виктори» клубини икки учрашув натижасига кўра ортда қолдириб (1:1, 2:1) турнирни давом эттирганди.

Осиё Чемпионлар Лигаси—2016
Нимчорак финал, жавоб учрашуви
24 май, сешанба

«Локомотив» (Ўзбекистон) — «Ал-Ҳилол» (Саудия Арабистони) 2:1 (1:0)

Голлар: Ислом Тўхтахўжаев (26), Шерзод Файзиев (55) — Муҳаммад ал-Шалҳуб (89-пенальти).
Огоҳлантиришлар: Икром Алибоев (32), Санжар Шоаҳмедов (54) — Наваф ал-Обид (22), Салмон ал-Фараж (52), Муҳаммад Жаҳфалий (74), Ёсир ал-Шаҳроний (90+2).

«Локомотив»: Игнатий Нестеров, Шерзод Файзиев, Кахи Махарадзе, Ислом Тўхтахўжаев, Салим Мустафоев, Темур Кападзе, Икром Алибоев (Марат Бикмаев, 70), Олег Зотеев (Сардор Мирзаев, 76), Санжар Шоаҳмедов (Сергей Прохоров, 85), Сервер Жепаров, Темурхўжа Абдухолиқов.

«Ал-Ҳилол»: Фаҳад аз-Зунайян, Абдуллоҳ аз-Зорий (Холид ал-Каъбий, 74), Дигао, Муҳаммад Жаҳфалий, Ёсир ал-Шаҳроний, Салмон ал-Фараж, Сауд Каририй, Наваф ал-Обид (Муҳамма ал-Шалҳуб, 46), Карлос Эдуардо (Ёсир ал-Қаҳтоний, 80), Салим ад-Доусарий, Аилтон.

Бош ҳакам: Бенжамин Уильямс (Австралия).