Рой Ҳожсон: «Биз Уэльсдан сюрприз кутмаяпмиз»

Англия терма жамоаси бош мураббийи Рой Ҳожсон Уэльсга қарши ўйинга тайёргарлик давомида интервью берди.

«Дерби муҳити – бу жуда ҳаяжонли. Англияда, Буюк Британияда, бутун дунёда бу ўйинни интиқлик билан кутишмоқда. Биз ўз қардошларимизга қарши ўйнаймиз. Бу эса оловга мой қуйгандек. Бу ҳолатда қизиқиш ортади.

Менимча, уэльсликлар Крис Коулмэн йўлга қўйган услубда ўйнашади. Биз уларнинг таркибида ва ўйинида ўзгариш бўлишини, сюрприз амалга оширилишини кутмаяпмиз.

Улар тўпга эгалик қилишга ёки тўпни топшириб қўйишга асосланган қандайдир алоҳида услубда ўйнайди, деб ўйламайман. Биз ҳам уларга сюрпризлар қилмоқчи эмасмиз – уэльсликлар барча футболчиларимизни яхши билишади.

Матбуот орқали сўз талашиш бошқа, майдондаги ўйин бутунлай бошқа. Уэльсликларда биздаги каби босим йўқ. Ахир улар биринчи ўйинда ғалаба қозонишди, ғалаба эса гуруҳдан 3 жамоа чиқиши мумкин бўлган вазиятда плей-офф йўлланмасини деярли кафолатлайди», – деган Ҳожсон.

Эслатиб ўтамиз, бундан олдинроқ Уэльс терма жамоаси Бэйл нашрлардан бирига берган интервьюсида Англия терма жамоасининг биронта футболчиси Уэльс терма жамоасидан ўрин ола олмаслиги ҳақида гапирганди.

Кўп ўтмасдан Англия терма жамоаси ҳужумчиси Уэйн Руни унга жавоб қайтарди.

Манба: Tribuna.UZ