Роналду: Португалия терма жамоаси —  Криштианунинг жамоаси эмас

Португалия терма жамоаси ҳужумчиси Криштиану Роналду Европа чемпионати ярим финалида Уэльсга қарши кечган ва 2:0 ҳисобидаги ғалаба билан якунланган ўйиндан кейинги фикрларини билдириб ўтди.

«Мен ҳамиша Португалия билан йирик турнирда ғолиб чиқишни истаб келганман. Ўз мамлакатинг шарифини ҳимоя қилиш — ҳамиша алоҳида иш. Мен ҳозир терма жамоа билан Европа чемпионлигини қўлга киритмоқчиман. 2004 йили финалда Грецияга қарши ўйнагандим, ўшанда 18 ёшда эдим, деярли бола… Ҳозир мен тажрибали, футболда кўп нарсани кўрган футболчига айландим. Мен ўзимга ва терма жамоага ишонаман. Ўйлайманки, биз финалга чиқишга ҳақлимиз — футболчилар ҳам, мураббийлар ҳам, жамоа ходимлари ҳам ва албатта бизнинг мухлисларимиз ҳам.

Португалияни финалда кутганлар кам. Энди биз ҳаётимиздаги энг катта орзулардан бирига эришишимиз мумкин. Мен бу мавсумда жамоам билан Европа чемпионлар лигасини ютдим. Европада яна бир бор ғолиб бўлишни истайман. Бизда ажойиб жамоа йиғилган. Ҳа, жамоа. Мен бу жамоага қўлимдан келганча ёрдам беряпман, ундан кўпмас. Ҳужумда ҳам, ҳимояда ҳам шерикларим ва мухлислар учун кураш олиб боряпман. Португалия — бу Криштианунинг жамоаси эмас. Жамоанинг бошқа футболчилари ҳам Евро давомида гол уришди. Бугун мен биринчи бўлиб гол урдим, лекин бу ҳеч нарсани англатмайди», — дея Роналдунинг сўзларини келтиради «Чемпионат».

Финалга чиққан Португалия 10 июль куни Германия — Франция жамоалари ўртасидаги иккинчи ярим финал жуфтлиги ғолибига қарши майдонга чиқади.

Манба: Tribuna.uz