Буюк Британия қирғоғида 1 тоннадан ортиқ кокаин ортилган кема қўлга олинди

1 тоннадан ортиқ кокаин моддаси ортилган кема Буюк Британия қирғоғида ушланди. Бу ҳақда «Би-би-си» хабар берди.

Британия соҳил бўйи хизмати ходимлари 18 август куни Корнуоллда «Бьянка» номли кемани тўхтатишган. Кемада кокаин солинган 50 қоп топилган, унинг миқдори 1 тоннадан ортиқ чиққан. Топилган наркотикнинг тахминий қиймати 80 млн фунт экани айтилган.

Кемада бўлган 3 киши, жумладан траулернинг 67 ёшли хўжайини Майкл Макдермотт қўлга олинган.

Маълум қилинишича, бу Буюк Британияда қўлга олинган тарихдаги энг йирик миқдордаги гиёҳванд моддаси партияси бўлди.