Дракслернинг «ПСЖ»га ўтиши футбол тарихидаги энг қимматбаҳо трансферлардан бири бўлиши мумкин

«Вольфсбург» ярим ҳимоячиси Юлиан Дракслер «ПСЖ»га ўтишга яқин турибди.

Bild нашри маълумотига кўра, унинг агенти Рогер Виттманн айни вақтда«ПСЖ» билан шартнома жиҳатларини муҳокама этиш учун Парижда бўлиб турибди.

Бундан олдинги хабарларда, парижликлар Дракслер учун 75 миллион евро – унинг шартномасида кўрсатилган товон пулини тўлашга тайёрлиги айтилганди.

Дракслернинг ўзи ёзги трансферлар даричаси очилганидан буён «Вольфсбург»ни тарк этишни истамоқда, лекин клуб уни қўйиб юбормоқчи эмас ва уни бу борадаги интервьюси учун 100 минг евро миқдоридаги жаримага тортган.

Агар Германия терма жамоасига номзод бўлган ушбу ёш футболчининг Париж жамоасига ўтиши амалга ошса, бу трансфер футбол тарихидаги энг қимматбаҳо трансферлар ўнлигига киради.