Украина президенти Петро Порошенко Янги йил табригида Украина миллий инқилобига 100 йил тўлгани ҳақида гапириб, украиналикларни ўтмишдаги хатоларни такрорламасликка чақирди. У Украина 1 йилдан бери Россиядан бир кубометр ҳам газ сотиб олмаганини қайд этиб ўтган.
У Янги йил мурожаатида 2017 йилни Украина учун алоҳида аҳамиятга эга бўлиши ҳақида гапирган. Унинг нутқи президент сайтида жойлаштирилган.
«Бу — Украина миллий инқилобига 100 йил тўладиган кун», — деган президент.
«Аммо ўшанда украинлар, ташқи таҳдидларга қарши курашмасдан, ўзаро низоларга берилишганди. Ҳозир ҳам агар мавжуд вазиятдан чиқмасак, сиёсий бошбошдоқликлар иқтисодиётни ортга қайтариб юбориши осон. Сиёсат — анархия ичида қолади. Мамлакатимиз эса —агрессор ўлжасига айланади», — деган Порошенко.
У тарихдан сабоқ олиш лозимлигини таъкидлаб, ҳатто Янги йил кечасида ҳам диққатни йўқотмаслик кераклигини билдириб ўтган.
«Мен ўз ишларимни сарҳисоб қилдим. Бошқа хатоларга йўл қўймайман», — деган Порошенко.
Украина президенти мамлакатнинг ўтган йилдаги ютуқларини санай туриб, Россиядан 2016 йил давомида бир кубометр ҳам газ харид қилинмаганини эътироф этган ва буни энергетик мустақиллик сифатида баҳолаган.
Порошенко украинларга ҳозирда аҳвол бир йил олдиндагига қараганда яхшироқ эканини, келажакка оптимизм кўзи билан қараш вақти эканини айтган. У давлатнинг иқтисодий инқироздаги даври ортда қолганига ишонч билдирган. Иқтисодий барқарорлик эса мамлакатнинг мудофаа салоҳиятини ҳам оширгани қайд этилган. У армия яхши қуроллантирилганини таъкидлаган.
31 декабрь куни Порошенко америкалик сенаторлар делегацияси билан биргаликда Широкино тумани ҳудудидаги ҳарбий базага ташриф буюрганди. У сенаторлар Жон Маккейн, Линдси Грэм ва Эми Клобучар билан учрашув ўтказган.
Маккейн ва Грэм Украинага учиш қурилмалари етказиб бериш ташаббускорлари саналишади, аммо президент Барак Обама бу ташаббусга тўсиқ қўйган.
