Тақдирини оғуга боғлаганлар

Чуст туманида яшовчи Холбек Турсунов (исм-фамилиялар ўзгартирилган) 2013 йилда жиноят ишлари бўйича Чуст тумани суди томонидан гиёҳвандлик моддасини сотгани учун 7 йил муддатга озодликдан маҳрум қилиниб, кейинчалик бу ахлоқ тузатиш ишлари жазосига алмаштирилган эди. Бироқ Х.Турсунов бундан тегишли хулоса чиқармади. Оғуфурушлик билан шуғулланишни яна бошлаб юборди, деб ёзади “Ҳуқуқ” газетаси.

Х.Турсунов таниши С.Алимовга 2 бўлак 15,67 грамм миқдорида “гашиш” гиёҳвандлик моддасини келишилган нархида сотаётган пайтда ҳуқуқни муҳофаза қилувчи органлар ходимлари томонидан қўлга олинди. Бундан ташқари, унинг яшаш хонадонидан ҳам ушбу турдаги гиёҳвандлик моддаси топилди.

Унинг ҳамқишлоғи Баҳрор Асроров ҳам шериги каби “тавбасига таянмаганлардан” бўлиб, шу жиноят туфайли аввал судланганлигига қарамай, такроран бу ишга қўл урди. Б.Асроров аввалдан Х.Турсунов билан гиёҳвандлик савдоси бўйича ҳамкор эди. 

Шу куни Баҳром ҳам ҳуқуқни муҳофаза қилувчи орган ходимлари томонидан оғу савдоси устида қўлга олинди. Ҳар икки оғуфуруш суд ҳукмига кўра жазога тортилди.