Пенс 2020 йилги президентлик сайловларига тайёрланаётгани ҳақидаги мақолани рад этди

АҚШ вице-президенти Майк Пенс New York Times нашрида у 2020 йилги президентлик сайловларига номзодини қўймоқчилиги таъкидланган мақолани рад этди.

Нашрда таъкидланишича, Пенснинг кўп сонли ёрдамчилари президентликка сайловолди кампанияси учун ҳомийлар изламоқда, Пенснинг ўзи эса "ўзининг сиёсий базасини шакллантирмоқда". Агар мақола рост бўлса, унда Пенс АҚШ президенти Дональд Трампни қўллаб-қувватламайди ва унга биринчи муддатидан кейин чақириқ ташламоқчи, ёки Трамп у ёки бу сабабларга кўра иккинчи муддатга сайланишни истамайди ёки буни қила олмайди. 

"New York Times’даги бугунги мақола жирканчдир ва мен, оилам ва бутун жамоам учун ҳақоратлидир. Ундаги гаплар мутлақ нотўғридир – бу ОАВнинг жорий маъмуриятни парчалашга уринишидаги сўнгги қадамларидандир", деб айтилган Пенс баёнотида.

"Биз қандай ёлғон янгиликларга дуч келмайлик, бутун жамоам президент кун тартибини илгари суриш ва унинг 2020 йилга қайта сайланиши учун барча саъй-ҳаракатларни амалга оширади. Қолган барча тахминлар кулгили ва бемаънидир", деб айтган Пенс.

АҚШ вице-президентлари гоҳ-гоҳида президент лавозимига номзодларини қўядилар, бироқ анъанага кўра буни амалдаги президент ҳокимият тепасида икки муддат бўлгандан сўнг ёки иккинчи муддатга сайланишдан бош тортганда ёки сайлана олмагандан кейин амалга оширадилар. АҚШ тарихида 14 нафар вице-президент, жумладан Катта Жорж Буш, Жеральд Форд, Ричард Никсон, Линдон Жонсон, Теодор Рузвельт ва Томас Жефферсон президент бўла олганлар.