Ички ишлар вазирлиги Академиясининг касбий тайёргарлик факультетига қабул қилиш тартиби белгиланди

Ўзбекистон Адлия вазирлиги томонидан Ички ишлар вазирлиги Академиясининг касбий тайёргарлик факультетига қабул қилиш тартиби давлат рўйхатидан ўтказилди.

Факультетга танлов асосида:

ёши ўн саккиздан кичик ва ўттиздан катта бўлмаган, ўрта махсус, касб-ҳунар ва олий маълумотга эга бўлган, ҳарбий хизматни ўтаган, соғлигининг ҳолатига кўра ва жисмоний тайёргарлиги бўйича хизмат қилишга яроқли деб топилган шахслар қабул қилинади.

Танлов икки босқичда (дастлабки ва махсус-профессионал) ўтказилади. Дастлабки танлов ҳужжатларни ўрганиш, дастлабки суҳбат, жисмоний тайёргарликни баҳолаш, тиббий кўрикдан иборат. Махсус-профессионал танлов ҳужжатларни ўрганиш, тиббий кўрик, касбий-психологик лаёқатни баҳолаш ва якуний суҳбатдан иборат.

Факультетда ўқиш муддати офицерлар таркиби ходимлари учун 6 ой, сержантлар таркиби ходимлари учун 5 ой этиб белгиланди.

Ҳужжат билан Ички ишлар вазирлиги академик лицейлари битирувчиларига касбий-психологик лаёқатни баҳолаш ва якуний суҳбатда улар тўплаган умумий баллнинг 20 фоизи миқдорида имтиёз бали қўшиб берилиши белгиланди.

Ҳужжат билан Ўзбекистон Республикаси Қонун ҳужжатлари маълумотлари миллий базасида (www.lex.uz) танишишингиз мумкин.