Бугун, 23 ноябрь куни Сеул шаҳрида давлатимиз раҳбари Шавкат Мирзиёев ўзининг Жанубий Кореяга давлат ташрифи доирасида Корея - Ўзбекистон бизнес-форумида иштирок этди.
Форумда икки давлатнинг иқтисодий ва молиявий тузилмалари раҳбарлари, етакчи ишбилармонлари қатнашишди.
Учрашув бошида Корея савдо-саноат палатаси раиси Пак Ёнг-ман Корея Республикаси президенти Мун Же-Иннинг бизнес-форум қатнашчиларига табрик мурожаатини ўқиб эшиттирди.
Ўзбекистон Республикаси президенти Шавкат Мирзиёев ўз чиқиши аввалида кореялик ҳамкасбининг форум қатнашчиларига мурожаати икки давлат ўртасидаги савдо-иқтисодий алоқаларнинг мустаҳкамланишида катта аҳамият касб этиши ва муҳим кўприк бўлиб хизмат қилишини қайд этди.
Президентнинг Корея Республикасига ташрифини ёритиш бўйича матбуот маркази «Kun.uz»га маълум қилишича, Ўзбекистон президенти Корея Республикаси ва Ўзбекистон ўртасида турли соҳаларда ўхшашликлар кўплигини таъкидлаб ўтди. У шунингдек, Ўзбекистон корейс тадбиркорлари учун кенг эшик очганини айтиб ўтди. Ўзбекистон президенти айни пайтда мамлакатда бизнес юритишни енгиллаштириш ва хорижий инвестициялари ҳимоялашга йўналтирилган чора-тадбирлар комплекси амалга оширилаётганини қайд этиб ўтди. Ўз чиқиши давомида президент Мирзиёев залда ўтирган Ўзбекистон молия-иқтисодий идоралари раҳбарларига корейс ишбилармонлари билан жипс ҳамкорликни йўлга қўйиш бўйича муайян топшириқлар берди.
«Менинг Корея Республикасига давлат ташрифим айнан сизлар билан бошлангани бежиз эмас. Биз Корея компанияларнинг инвестициялари, илғор технологиялари ва менежментини Ўзбекистон иқтисодиётини ривожлантириш учун жалб қилишдан манфаатдормиз. Бизда корейс бизнесига тақдим этишга арзигулик нарсалар бор», — деди президент Мирзиёев.
«Алоҳида қайд этиб ўтишим керакки, бугун биз мамлакатимизга ишончни мустаҳкамлаш йўли билан инвесторларни жалб қилиш, узоқ муддатли ва олдиндан тахмин қилса бўладиган сиёсат, шаффоф ишбилармонлик ва инвестицион иқлимни шакллантиришга йўналтирилган қатъий чораларни жорий этмоқдамиз. Бу биз томонимиздан тасдиқланган кейинги 5 йилга Ўзбекистонни ривожлантириш Стратегиясининг энг устувор йўналишларидан бири ҳисобланади.
Биринчидан, биз шу йилнинг сентябридан валюта бозорида компаниялар учун тўсиқларни бутунлай бартараф этиб, миллий валютанинг эркин конвертациясини жорий этдик.
Иккинчидан, биз ташқи савдо сиёсатини янада эркинлаштириш бўйича фаол чоралар кўришда давом этаяпмиз.
Жаҳон савдо ташкилотига аъзо бўлиш борасидаги ишларни қайтадан бошладик.
