NBC: Жанубий Корея президенти Трамп билан учрашув олдидан голф машғулотларини қайта бошлади

Доналд Трамп бир нечта штатда голф майдонларига эгалик қилади, дунёнинг қатор етакчилари учун мазкур спорт тури АҚШ президенти билан яқинлашишнинг муҳим усули ҳисобланади.

Фото: Getty Images

Жанубий Корея президенти Юн Сок Ёл АҚШнинг янги сайланган президенти Доналд Трамп билан учрашувга тайёргарлик кўриш жараёнида голф билан боғлиқ машғулотларини қайта тиклади, деб хабар беради NBC News.

Жанубий Корея президенти офисининг маълум қилишича, давлат раҳбари «саккиз йилдан бери биринчи марта ўзининг голф учун клюшкасини олган».

Телеканалга кўра, Трамп бир нечта штатда голф майдонларига эгалик қилади, қонун чиқарувчилар, бизнесменлар ва дунёнинг қатор етакчилари учун мазкур спорт тури АҚШ президенти билан яқинлашишнинг муҳим усули ҳисобланади.

Трампнинг сайловлардаги ғалабасидан кейин Юн Сок Ёл иқтисодиёт ва хавфсизлик бўйича фавқулодда йиғилиш чақирганди. Жанубий Корея амалдорлари асосан Трампнинг АҚШга кириб келадиган барча импорт маҳсулотларига 20 фоиз бож жорий этиш борасидаги ваъдасидан, шунингдек, Шимолий Кореяга нисбатан «ўйинларидан» хавотирда. Трамп президентлигининг биринчи муддатида КХДР етакчиси Ким Чен Ин билан учрашган эди.

Эслатиб ўтамиз, 2017 йилда Доналд Трамп ўз президентлигининг ҳар бешинчи кунини голф-клубларда ўтказгани тўғрисида хабар берилганди. Трамп асосан Флорида штатидаги Палм-Бичда голф ўйнайди. У, шунингдек, ўзининг Ню-Жерси ва Вашингтондаги голф майдонларига ҳам ташриф буюриб туради.