Яқин ўн йил ичида юз бериши мумкин бўлган энг хавфли ҳодисалар маълум қилинди  

Bloomberg ахборот агентлиги яқин ўн йил ичида юз бериши мумкин бўлган энг хавфли ҳодисаларнинг ҳар йиллик шарҳини чоп этди.

Қизиғи, бу хавфли ҳодисалар сифатида атом уруши, оммавий терактлар, ҳокимиятнинг яширин ҳукуматлар томондан эгалланиши, оммавий қирғин қуролларининг тарқалиши, катта кўламларда инсон ҳуқуқларининг поймол қилиниши кабилар умуман эслаб ўтилмаган. 

“Дунё фалокат ёқасида. Шимолий Корея уруш бошлаш билан қўрқитмоқда. Дональд Трамп яна нима ҳунар кўрсатади, ҳеч ким билмайди. Бу ерда келтирилган сценарийларни прогноз деб қабул қилиш керак эмас. Аксинча, бизнинг дунё қанчалик тез ўзгараётгани ҳақида сизни ўйлантирувчи фикрлардир”, деб маълум қилган ахборот агентлиги.  

Агентлик энг хавфли ҳодиса сифатида Дональд Трампнинг иккинчи муддатга президент бўлишини кўрсатган. Рўйхатдан ҳаммаси бўлиб 8 та сценарий жой олган:

Дональд Трамп иккинчи муддатга президент этиб сайланади;   
Фейсбук ёлғон хабарлар билан курашда мағлуб бўлади;
Биткоин банкларнинг ўрнини эгаллайди;
Шимолий Корея уруш бошлайди, бироқ унинг етакчиси Ким Чен Ин ўлади;
Социалистлар Буюк Британияда ҳокимиятни эгаллаб оладилар;
Пенсионерлар Европанинг парчаланишига сабаб бўладилар;  
Хитой савдо уруши бошлайди;
Электрокарлар нефтдан боғлиқлик устидан ғалаба қилади.

Бироқ бу ҳодисалар ичида баъзиларини умуман хавф деб аташ ноўриндир. Мисол учун, агар инсоният нефтдан электромобилларга ўтса, бунинг нимаси ёмон ва бундан нефть магнатларидан бошқа ким ҳам қўрқиши мумкин?