Енгил атлетика бўйича жаҳон чемпиони, америкалик спринтер Жастин Гэтлин ва унинг мураббийи, собиқ Олимпия чемпиони Деннис Митчелл тақиқланган воситалар контрабандасида гумон қилинмоқда.
ТАСС ахборот агентлигининг маълум қилишича, The Telegraph британ нашрининг журналистлари 2017 йил ёзда ниқоб остида спортчи ва унинг мураббийининг допинг етказиб беришга алоқадорлигини тергов қила бошлашган. Нашрга спортчиларни жисмоний унумдорликни оширувчи воситалар билан таъминловчи агент ва мураббийлар ҳақида маълум қилингандан кейин, терговни бошлашга қарор қилинган. Гумонланувчилар орасида Гэтлин билан ҳамкорлик қилувчи Роберт Вагнер исми ҳам келтирилган.
Журналистлар ўзларини енгил атлетикачилар ҳақида фильм суратга олаётган гуруҳ вакиллари сифатида таништиришган. Улар Флоридадаги машғулот марказида бўлганларида фильм сценарийси бўйича енгил атлетикачи-актёр ҳақиқий спортчилар билан баробар мусобақалаша олиши керак бўлган. Журналистларга бунга эришиш учун шартнома бўйича допинг етказиб бериш таклиф қилинган. Бу хизматнинг қиймати 250 минг долларни ташкил қилган. Журналистларнинг ушбу масала бўйича Митчелл ва Вагнер билан музокаралари аудио ва видео қурилмаларга ёзиб олинган. Вагнер суҳбат чоғида жаҳон чемпиони Гэтлин ҳам тақиқланган ва уларни ниқобловчи воситалар қабул қилганини тан олган.
1998 йилда Деннис Митчелл Олимпия чемпиони бўлган, бироқ бир неча кундан кейин қонидаги тестостерон моддаси меъёридан кўплиги аниқлангач, мусобақалардан четлатилган. У Олимпия олтин медалидан маҳрум этилган.
Жастин Гэтлин 4 карра жаҳон чемпиони, ўз вақтида допинг учун 4 йилга мусобақалардан четлатилган. Енгил атлетика бўйича сўнгги жаҳон чемпионатида 2017 йил августда 100 метрга югуриш финалида афсонавий Усейн Болтни доғда қолдириб, ғолиб бўлганди.
