Media Markt электроника дўконлари тармоғи асосчиси 78 ёшида вафот этди

Германияда электроника дўконлари тармоғи Media Markt асосчиларидан бири, миллиардер Эрих Келлерхальс 78 ёшида вафот этди. Маълум қилинишича, тадбиркор 25 декабрда оиласи қуршовида ҳаётдан кўз юмган.

Келлерхальс ўз бизнесини Баварияда 1963 йилда велосипед, мойли иситгичлар, радио ва телевизорлар сотишдан бошлаган. Келлерхальс бизнес-ҳамкорлари Леопольд Штифел ва Вальтер Гунц билан 1979 йилда Мюнхенда ўзларининг биринчи электроника дўкони Media Markt’ни очишган. Улар бизнесни кенгайтириш учун компаниянинг 54 фоиз акциясини 1988 йилда Kaufhof’га сотиб юборишган. 1990 йилда Келлерхальс ва Штифель чакана савдо қилувчи бўлинмаси номини Media-Saturn’га ўзгартиришган. Бугунги кунда Media Saturn Европанинг 15 та давлатида мингдан кўпроқ дўконга эга. Компаниянинг йиллик тушуми 23 млрд долларни ташкил қилади.  

Келлерхалс рафиқаси билан Зальцбургда яшаган. 2004 йилда улар Convergenta Invest und Beteiligungs GmbH холдинг компаниясига асос солишган. Улар бу компания орқали Австрия, Германия ва Польшадаги савдо марказлари ва кўчмас мулкка инвестициялар киритишган.

Тадбиркор Forbes рўйхатига илк бор 2014 йилда киритилган, ўшанда унинг бойлиги 4 млрд долларга баҳоланган. Бироқ йилдан йилга унинг бойлиги паст баҳоланиб келган ва 2017 йил мартида 1,8 млрд долларни ташкил қилган.