Олимлар организмда “ички тарозилар” борлигини аниқлашди

Гётеборг университети олимлари организмда тана вазнини тартибга солиб турувчи ички тизим борлигини аниқлашди. Тегишли тадқиқот Proceedings of the National Academy of Sciences (PNAS) журналида чоп этилди.

Мутахассислар тажриба ўтказишиб, сичқонларга оғир капсулалар имплантация қилишди. Икки ҳафтадан кейин сунъий “ортиқча вазн”га эга сичқонлар камроқ озиқлана бошлаганлар ва организмларидаги ёғнинг анча қисмини йўқотишган. Таъкидланишича, сичқонлар уларга киритилган сунъий юк қанча бўлса, шунча миқдорда вазн йўқотишган.   

Олимлар организмда “ортиқча вазнни қайд қилувчи” механизм мавжуд бўлиб, у мияга озиқланишни камайтириш ҳақида сигнал жўнатади, деган хулосага келганлар. Мутахассисларнинг фикрича, бу жараён остеоцит томондан назорат қилинади.  

Остеоцит умуртқали жонзотлар, жумладан инсоннинг суяк тўқимаси ичида жойлашган махсус турдаги ҳужайралар ҳисобланади.