Falcon 9 ракетаси Люксембургнинг GovSat-1 сунъий йўлдоши билан Флоридадан учирилди.
Ракета Тошкент вақти билан 1 февраль соат 02.25да Канаверал бурнидаги космодромдан учирилган. У икки мақсадли GovSat-1 сунъий йўлдошини орбитага олиб чиқади. Ракета бир кун аввал учирилиши керак бўлган, бироқ иккинчи поғонасидаги датчикни алмаштириш зарурати сабабли қолдирилган.
Ракетанинг биринчи поғонаси қайта ишлатилган бўлиб, у ўтган йил май ойидаги парвоздан кейин сақлаб қолинганди. SpaceX учун бу парвоз ишлатилган биринчи поғона билан амалга оширилаётган 6-парвоздир. Жорий парвоздан кейин биринчи поғонани қайтариш кўзда тутилмаган.
Люксембургнинг SES компаниясига тегишли сунъий йўлдош ҳам мудофаа, ҳам фуқаролик мақсадлари, жумладан мобил ва стационар алоқа учун мўлжалланган. Сунъий йўлдош уни ўчиришга уринишлардан кучайтирилган ҳимоя функциялари билан таъминланган, у телеметрияни шифрланган кўринишда узатиши ва ҳарбий частоталардан фойдалана олиши мумкин.
SES’да маълум қилинишича, қурилма Европа, Яқин Шарқ, Африка ҳудудларини қоплай олади ҳамда Атлантика ва Ҳинд океанлари устида кемалар сигналлари узатилишини таъминлайди.
Falcon 9 парвози 8 январдаги парвоздан кейин биринчиси бўлди. Ўшанда ракета АҚШнинг Zuma махфий сунъий йўлдошини орбитага олиб чиқиши керак эди, бироқ миссия муваффақиятсиз якунланган ва сунъий йўлдош йўқотилган.
