NASA Ердан энг олис масофада олинган суратни намойиш қилди

New Horizons сайёралараро автоматик станцияси Ердан 6,12 млрд километр узоқликда бўла туриб, коинот суратини олди ва Voyager-1 коинот қурилмасининг рекордини янгилади. Voyager-1’нинг рекорди 6,02 млрд километрни ташкил қилганди. Бу ҳақда Phys.org сайтида маълум қилинди.

New Horizons дастлаб “Истаклар қудуғи” деб номланувчи NGC 3532 юлдузлар тўпламини суратга олган. У Ердан 1300 ёруғлик йили узоқлигида жойлашган.  

Сўнгра станция яна узоқроқ бориб, Қуёш тизимининг Нептун орбитаси ортида жойлашган Койпер камаридаги бир нечта объектларни суратга олган.  

Койпер камари муз, метан ва аммиакдан ташкил топган кичик жисмлар ҳамда митти сайёралардан иборат. Бу митти сайёраларга Плутон ҳам киради. Станциядаги Long Range Reconnaissance Imager (LORRI) камераси 2012 HZ84 ва 2012 HE85 жисмларини суратга олган. 

New Horizons станцияси коинотга 2006 йил 19 январда Канаверал бурнидаги космодромдан Atlas V ракетаси ёрдамида учирилган. Қурилманинг асосий вазифаси Плутон ва унинг йўлдоши Харонни ўрганиш ҳисобланади. Станция 2015 йилда Плутонга деярли “тегиб” ўтган: у билан Плутонни коинот ўлчамларига кўра жуда кичик масофа – 12,5 минг кмгина ажратиб турган. 

Станциянинг миссияси 2020 йил ўрталарида якунига етиши керак.