Пёнгчанг-2018: Ҳоккейда сенсация! Олимпиада тарихида ҳеч қачон кузатилмаган натижа қайд этилади

Жанубий Кореянинг Пёнгчанг шаҳрида давом этаётган Қишки олимпиада ўйинларининг энг оммавий спорт турларидан бири саналган ҳоккей бўйича ярим финал учрашувлари ўтказилди.

Мусобақанинг энг шов-шувли натижаси шу турга келиб қайд этилди. Сўнгги учта олимпиада чемпиони бўлган Канада терма жамоаси бу босқичга келиб, кутилмаганда Германия терма жамоасига имкониятни бой бериб қўйди — 3:4. Миллий ҳоккей лигаси (NHL) вакилларисиз тузилган аралаш таркибдаги Канада энди фақатгина 3-ўрин учун курашадиган бўлди.

Иккинчи ярим финалда Россиялик олимпиячи атлетлар Чехия терма жамоасини мағлубиятга учратиб финал йўлланмасини қўлга киритди. Эндиликда россияликлар финалда Германия терма жамоасига қарши баҳс олиб боради.

Эслатиб ўтамиз, шу кунгача бу икки терма жамоа ҳеч қачон олимпиадаларда олтин медални қўлга киритмаган. Россия 1998 йилдан буён илк марта финалга чиққан бўлса, Германия учун бу мутлақо биринчи финал бўлади.

Финал учрашуви 25 февраль куни бўлиб ўтади.

Олимпиада-2018
Ҳоккей. 1/2 финал
Канада – Германия – 3:4 (0:1, 1:3, 2:0)
Чехия – Россиялик олимпиячи атлетлар – 0:3 (0:0, 0:2, 0:1)