Америкалик аёл бир йил ичида 4 марта Оқ уйга “бостириб кирмоқчи бўлди”

АҚШнинг Теннеси штатида яшовчи 35 ёшли Жессика Форд ўз автомобилида Оқ уй ҳудудига кирмоқчи бўлиб, унинг олдидаги панжара бориб урилган. Полиция ходимлари бир йил ичида тўртинчи маротаба ёпиқ ҳудудга кирмоқчи бўлган аёлни қўлга олишган.

Гувоҳларнинг айтишича, аёл панжарага атайлаб урилган ва тўқнашувдан кейин ҳам газ тепкисидан оёғини олмаган. АҚШ махфий хизматида воқеа оқибатида ҳеч ким жабрланмагани, аёл эса тўппонча сақлагани, атайлаб авария содир этгани ва бошқа қоидабузарликлар учун ҳибсга олинганини маълум қилган.

АҚШ президенти Дональд Трамп воқеадан кейин махфий хизмат ходимларига “яхши иш” учун миннатдорлик билдирган.

Махфий хизмат вакиллари аёл билан аввал ҳам тўқнаш келганлари ва унинг шу каби ҳодисалар учун ушлашганини маълум қилишган. Аёл жумладан:

2017 йил апрелда Оқ уй панжарасидан ошиб ўтмоқчи бўлганда ушланган, айбини тан олгач, бинога яқинлаши тақиқланган;

2017 майда яна Оқ уй панжарасидан ошиб ўтмоқчи бўлган, айбини тан олгач, тақиқловга амал қилмагани учун 30 кунга қамоққа олинган; 

2017 йил июлда у учинчи бор Оқ уйга кирмоқчи бўлган ва айбини тан олгач, 90 кунга ҳибсга олинган ва психологик текширувга жўнатилган.