Бир неча марта нокдаунга учраб, ғалабага эришган боксчи жангдан кейин ҳаётдан кўз юмди

Бокс бўйича ярим оғир вазнда иштирок этган британиялик боксчи Скотт Вестгарт ҳамюрти Дек Спелманга қарши жангда ғалабага эришгандан кўп ўтмай ҳаётдан кўз юмди. Бу ҳақда BBC Sport хабар бермоқда. 

31 ёшли Вестгарт рақибини очко бўйича мағлуб этган. Жанг давомида икки боксчи ҳам бир неча марта нокдаун ҳолатига тушган.

Маълум қилинишича, Вестгарт жангдан кейин интервью бераётганда ўзини ёмон ҳис қила бошлаган. Боксчи ечиниш хонасига базўр етиб борган ва у ердан шифохонага олиб кетилган. Боксчи ўзига келмай, миясига қон қуйилиши оқибатида вафот этган.

Бокс кечасининг бошқа бир боксчи Кертис Вудхаус иштирокидаги бош жанги ушбу воқеа сабабли бекор қилинган. 

Таъкидланишича, Вестгарт 7 йиллик профессионал фаолияти давомида 10 та жанг ўтказиб, улардан 7 тасида ғалаба қозонган, иккита мағлубиятга учраган ва бир марта дуранг натижа қайд қилган. Британиялик Англия чемпиони унвони олиш учун ҳаракат қилаётган бўлган.