Давлат хизматларини кўрсатиш тизимига янгича ёндашувлар масалалари муҳокама қилинди

4 май куни Тошкент шаҳридаги Wyndham меҳмонхонасида давлат органлари ва фуқаролик жамияти вакиллари Ўзбекистонда давлат хизматларини кўрсатишни янада такомиллаштириш йўлларини муҳокама қилишди. Қизиқарли ўтган семинар Жаҳон тараққиёт банки, Европа Иттифоқининг Ўзбекистондаги ваколатхонаси ҳамда "Тараққиёт стратегияси" маркази билан ҳамкорликда ташкил этилди.

Тадбирда иштирок этган KUN.UZ мухбирининг хабар беришича, семинарда давлат хизматларини кўрсатишга доир энг яхши тажрибалар тақдим этилди ва улар қиёсий таҳлил қилинди. Шунингдек фуқаролар учун давлат хизматларини кўрсатиш қоидалари муҳокама қилинди. Шу ўринда Ўзбекистонда паспорт олиш жараёни, унга қанча вақт сарфланиши, унинг тартиб-қоидалари ва бу жараённинг бошқа давлатларда қандай кечиши мисоллар билан тушунтириб берилди. Давлат хизматларини кўрсатишда энг яхши тажрибалар сифатида Сингапур, Австралия, Қирғизистон, Қозоғистон каби мамлакатлар мисол қилинди.

Семинар давомида Давлат хизматлари агентлигининг 30 дан ортиқ ходими, Тошкент шаҳри Ер ресурслари ва давлат кадастр бошқармаси, Вазирлар Маҳкамаси ҳузуридаги "Ўзархив" агентлиги, Ички ишлар вазирлиги ва фуқаролик жамияти институти вакиллари иштирок этишди.

Шуниси диққатга сазоворки, тадбир давомида ташкилотчилар ва юқоридаги идоралар вакиллари ўртасида ўзаро баҳс-мунозаралар қизғин тус олди. Давлат бошқаруви бўйича эксперт Азиза Умарованинг Ўзбекистондаги паспорт олиш тизимини соддалаштиришга доир инновацион таклифларига Ички ишлар вазирлиги вакили у мамлакатлар билан юртимиз аҳолисининг ўртасида фарқ борлиги, боз устига, айни дамда бу борада инновацияларга қўл урилаётгани, тез орада уларнинг натижаси кўринишини таъкидлади. Бунга жавобан фуқаролик жамияти институти вакили давлат бошқаруви бўйича экспертнинг таклифлари ўринли экани, ИИВ эътирозга шошилмай, инновацияларни тизимга татбиқ қилишга ҳаракат қилиши мақсадга мувофиқ бўлишини қайд этди.

Жаҳон банки маслаҳатчиси, давлат бошқаруви бўйича эксперт Азиза Умарова давлат хизматларини кўрсатиш тизимини фуқаролар эҳтиёжига янада мослаштиришга доир қизиқарли таклифлар билдирди ва бу борада Ўзбекистонда татбиқ этилиши мумкин бўлган жаҳон тажрибалари билан бўлишди.

"Назаримда, ушбу тадбир жуда долзарбдир, чунки давлат хизматларини кўрсатишга бўлган қизиқиш энг юқори даражада ошиб бормоқда. Кеча Президентимиз Давлат хизматлари агентлигига ташриф буюрдилар. Фикримча, ҳозир бугунга қадар қилинган ишлар ва олдинда яна қандай чақириқлар борлиги ҳақида гаплашишнинг айни вақти. Бу борадаги муаммоларни ҳал қилмай туриб, давлат хизматлари кўрсатишнинг янги, сифатли босқичига ўтиб бўлмайди. Бугун биз давлат органлари ичида бизнес жараёнларни реинжиниринг қилиш нақадар муҳимлиги, давлат органларининг фуқаролар билан мулоқот қилиш формати қандай ўзгариши кераклиги, давлат хизматларини кўрсатиш стандартлари қандай бўлиши кераклиги, давлат хизматларини кўрсатишда инновацион ечимлар ҳақида суҳбатлашдик. Дунёнинг турли бурчакларидаги илғор тажрибаларга назар солишга ҳаракат қилдик ва бу янгиликларнинг қай бир элементларини Ўзбекистонда қўллашимиз мумкинлигини муҳокама қилдик. Шунга диққатингизни қаратишни истардимки, минтақадаги кўп қўшниларимиз давлат тўловларининг дифференциал шкаласига ўтишган. Бу нима дегани? Давлат хизматларига эга бўлишда - масалан, паспорт ё боланинг туғилганлик тўғрисидаги гувоҳномасини олишда сиз  шошилинч кўрсатилган хизматлар учун расман кассага пул тўлайсиз ва  ҳужжатларни тезлаштирилган тартибда оласиз. Масалан, паспортни Грузияда - 1 кунда, Озарбойжонда - 1 кунда, Қирғизистонда эса 3 соатда олиш мумкин. Ўйлашимча, бундай инновацион ёндашувлар давлат бюджетини сезиларли даражада ошириши мумкин, чунки одамлар зарурат туғилганда ортиғи билан пул тўлашга тайёр бўлишади. Бундан ташқари, одамлардан тушадиган бундай сумма давлат органлари модернизациясига - реестрлар ва маълумотлар базасини рақамлаштириш, керакли техникани харид қилиш, давлат хизматчилари иш ҳақини оширишга сарфланиши мумкин. Менинг фикримча, бундай мураккаб бўлмаган ечимлар бугунги кунда катта ўзгаришларга туртки  берар эди", - дейди Азиза Умарова.