Фидел Кастрога суиқасд қилишга уринишда айбланган террорчи вафот этди

Кубанинг кўп йиллик етакчиси, марҳум Фидел Кастрога суиқасд қилишга тайёрланишда айбланган кубалик муҳожир Луис Посада Каррилес АҚШда 90 ёшида вафот этди. Бу ҳақда Miami Herald нашри маълум қилди. 

Каррилес адвокатининг маълум қилишича, Куба етакчисининг энг фаол рақибларидан бири саратон касаллигидан азият чеккан. Охирги маҳал у Флорида штатида яшаган. 

Гавана ва Лотин Америкасининг бир қатор давлатларининг маълум қилишича, Каррилес 1976 йилда Барбадос соҳили устида Cubana de Aviacion компанияси самолётини портлатишни ташкиллаштиришга алоқадор ҳисобланади. Самолёт портлатилиши оқибатида 73 киши ҳалок бўлган. Бу теракт Лотин Америкаси тарихидаги энг кўп қон тўкилгани бўлган.  Бундан ташқари, Гавананинг таъкидлашича, Каррилес 1997 йилда Кубадаги меҳмонхоналарнинг портлатилишини ташкиллаштириш ва 2000 йилда Кастрога суиқасд қилишга уринишга алоқадор бўлган.

Каррилес Венесуэлада теракт содир этгани учун судланган, бироқ турмадан қочишга муваффақ бўлган. У 2005 йилда АҚШ чегарасини ноқонуний кесиб ўтиш вақтида ушланган. Бироқ АҚШ суди Марказий разведка бошқармасининг собиқ агенти бўлган Каррилесга террорчилик бўйича айбловлар қўймаган ва уни Куба ёки Венесуэлага қайтаришни рад этган.