Бугун клублар мавсумининг асосий баҳси ўтказилади.
Зинедин Зиданнинг «Реал»и бугун кетма-кет учинчи марта Европа Чемпионлар Лигаси кубогини қўлга киритиш учун Юрген Клопп бошчилигидаги «Ливерпуль»га қарши майдонга тушади. Финал баҳсига Киевдаги «Олимпийский» стадиони мезбонлик қилади.
Учрашув Тошкент вақти билан соат 23:45да бошланади. Ўйинни ўзбекистонлик футбол ишқибозлари Futbol-TV телеканали томонидан жонли эфирда томоша қилишлари мумкин. Шунингдек, финал ўйини «Матч ТВ»да жонли эфирда узатилади.
Кимлар бошланғич таркибда?
«Ливерпуль» — кучли захира ўриндиғига эга эмас. Бу жамоанинг асосий заифлиги: ўйин давомида ҳужум чизиғини кучайтириш учун Клоппда фақат Соланке ёки Ингзни, ҳимоя марказига эса – фақат Клаванни тушириш имконияти мавжуд. Ҳужум чизиғи вакиллари ҳамиша бир хил таркибда майдонга тушиб келган ва ротация имкониятлари чекланган.
Шу туфайли «Ливерпуль» ҳар доимгидек 4-3-3 схемасида ўйинни бошлайди, Окслейд-Чемберленнинг жароҳатидан кейин ярим ҳимоя марказидаги учлик Милнер, Хендерсон ва Вейналдумдан иборат, бу учликни кучайтириш имконияти ҳам йўқ, Лаллана ва Жан ҳали спорт формасини тикламаган: бири жароҳатидан тузалиб қайтганидан кейин фақат 15 дақиқа майдонда ҳаракат қилди, иккинчисида шу ҳам йўқ. Ўйин давомида вазиятни ўзгартириш учун Клоппдан ижодий ёндашув талаб этилади.
«Реал»да — бутунлай акси. Бу жамоа мавсумнинг энг турланувчан жамоаси бўлди, яққол мисол: «Ювентус» билан ўйинларда «Реал» икки хил таркиб билан ҳаракат қилди.
Зидан амалдаги Европа чемпионларини кучли рақибга қарши хотиржам тайёрламоқда. У 3 нафар марказий ярим ҳимоячиларни майдонга ташлайди, уларга «ўнлик» ҳужумчи Иско ёрдам бериб, тўп назоратига жавоб беради. У рақиб прессинг уюштира олмай қолганида, асосий таянч ярим ҳимоячиси Каземиросиз ўйнаши ҳам мумкин, рақибга босим уюштириш лозим бўлганида Анчелотти услубида қанотларни кучайтириши мумкин. Битта нарса ўзгармайди: «Реал» ўйин давомида ўзгариб боради. Васкес, Асенсио ва Бэйл захира ўриндиғида Зиданнинг уларга кўрсатма бериб, майдонга ташлашини кутиб туришади, мураббий улардан аъло даражада фойдалана олади.
Финал арафасида мадридликларнинг бошланғич таркибида Бэйл бўлиши ёки бўлмаслиги кун тартибига чиққан. Кейинги икки мавсум финалида Зидан прагматизм орқали ғалабаларга эришди, бу прагматизм эса Каземирони Кроос ва Модрич, шунингдек «ўнлик» ҳужумчи Иско билан бирга майдонга туширишни талаб этарди. Иско бу ўйинларда қанотларда ҳам ҳаракат қилиб, жамоага катта фойда келтирган.
