“Мерседес”дан каттароқ: Путин Абу-Даби валиаҳд шаҳзодасига янги лимузинини кўрсатди (видео)

Россия президенти Владимир Путин Абу-Даби валиаҳд шаҳзодаси Муҳаммад Ал Наҳаёнга “Кортеж” лойиҳаси бўйича яратилган янги лимузинини намойиш қилди. Путин бу лимузиндан илк бор 7 май куни инаугурацияси вақтида фойдаланган ва шундан бери ундан ишчи машина сифатида фойдаланиб келмоқда. 

Аввал Путин ишчи автомобил сифатида “Мерседес”дан фойдаланган. Путин Ал Наҳаён билан суҳбат бошида янги машинага “Мерседесдан сал каттароқ” деб таъриф берган.

Валиаҳд шаҳзода машинани ташқи томондан кўриб чиқиб, унинг орқа ўриндиғига ўтирган. Видеодан кўринишича, машина унда яхши таассурот қолдирган. 

“Кортеж” лойиҳаси ўз ичига лимузин, седан, минивэн ва йўлтанламасни олади. Машиналар 2019 йилдан сотувга чиқиши кутилмоқда. Истиқболда машиналар электр двигател билан жиҳозланиши мумкин.