Депутат: Савдо-саноат палатаси ўз фаолиятини танқидий кўриб чиқиши керак

Олий Мажлис Қонунчилик палатаси депутати Элдор Туляков Facebook’даги саҳифасида янги таҳрирдаги Савдо-саноат палатасидаги қонун бўйича ўз фикрларини қолдирди.

«Олий Мажлис Қонунчилик палатасининг ўтган ҳафта бўлиб ўтган мажлисида «Ўзбекистон Республикаси Савдо-саноат палатаси тўғрисида»ги қонун қизғин мунозаралардан сўнг, янги таҳрирда қабул қилинди.

Айтиш жоизки, мазкур ҳужжатни кўриб чиқиш жараёнида йирик тадбиркорлик субъектларини Ўзбекистон Савдо-саноат палатасига мажбурий аъзолик қилиш масаласи депутатларнинг энг кўп муҳокамасига сабаб бўлди. Бу борада турли фикрлар билдирилди, таклифлар илгари сурилди. Шундай бўлса-да, кўпчилик овози билан мазкур норма маъқулланди.

Хўш, унинг шу тахлитда қабул қилинишига сабаб нима? Нега айнан йирик тадбиркорлик субъектларининг Палатага аъзолик кўрсаткичлари шу пайтгача паст бўлиб келган? Эндиликда бу ҳолат қандай бўлади? Йирик тадбиркорлик субъектларининг талаби қай даражада қондирилади?

Таъкидлаш лозимки, йирик тадбиркорлик субъектларида ҳар доим малакали кадрлар фаолият юритиб келган. Бунга, албатта, бир нечта сабабларни келтириш мумкин. Ойлик маош юқорилиги, қўшимча тақдирлаш, бонуслар, ижтимоий таъминот, мансабда кўтарилиш кабилар шулар жумласидандир. Бу эса йирик тадбиркорлик субъектларига ҳозирги вақтгача ўз муаммоларини ўзлари ҳал қилиш имконини берган, шу жумладан, суд орқали ҳам. Консультатив хизматларга эҳтиёжлар ҳам айнан ўзларининг малакали кадрлари орқали қондирилган.

Эндиликда агар йирик тадбиркорлик субъектлари мажбурий равишда аъзолик бадалини тўлашар экан, айнан ўша йирик тадбиркорлик субъектларининг малакали кадрлари Ўзбекистон Савдо-саноат палатасидан лозим даражада хизмат кўрсатилишини қонуний равишда талаб қила бошлайдилар. Сабаби, улар бадални ўз вақтида тўлаб борадилар. Агарда, қонун кучга кириши билан Савдо-саноат палатаси бундай хизматларни лозим даражада кўрсата олмаса, оқибатда ранжиган тадбиркорлардан унга қарши судда даъво аризалар сонининг ортиши кузатилиши мумкин.

Шундай экан, Савдо-саноат палатаси, энг аввало, ўз фаолиятини, ўзининг кадрлар салоҳиятини, айниқса, қуйи бўғиндагисини танқидий қайта кўриб чиқиши талаб этилади. Зеро, бугун барча соҳада давлат органлари билан самарали ҳамкорлик ўрнатиш, ўз ишига масъуллик билан ёндашиш ҳаётий заруратга айланмоқда. Бироқ Палатанинг ҳозирги кадрларининг, айниқса, қуйи бўғиндагиларининг малакасини оширишга вақт ҳам, имкон ҳам йўқ. Шу сабабли, Палата фаолиятига мутахассисларни бошқа давлат органларидан ҳам жалб қилиш, солиқ, божхона, маркетинг каби соҳаларда юқори малакали хизмат кўрсатиш тизимини яратиш, бунинг учун кадрлар салоҳиятидан фойдаланиш мақсадга мувофиқ. Палата кўрсатадиган барча хизматлар сифатини кескин даражада ошириб, йирик тадбиркорлик субъектлари талабини қондирадиган даражага етказилсагина улар Палатага ўз хоҳиш-истаклари билан аъзо бўларди ҳамда мавжуд имкониятлардан унумли фойдаланиларди.

Бир сўз билан айтганда, бу саъй-ҳаракатлар мамлакатимизда ишбилармонлик ва инвестиция муҳитини яхшилашга ҳар томонлама кўмаклашиш, тадбиркорлик субъектларининг ҳуқуқлари ва қонуний манфаатларини ҳимоя қилиш кафолатларини кучайтиришга хизмат қилади», дея ёзган депутат.

Бундан олдинроқ Савдо-саноат палатасига аъзолик кичик бизнес ва хусусий тадбиркорлик субъектлари учун ихтиёрий бўлиши ҳақида хабар қилинганди.