Эрдўған сайловлардаги ғалабадан кейин куну-тун ишлашга ваъда берди

Туркия президенти Ражаб Тоййиб Эрдўған президент сайловларидаги ғалабасидан кейин Анқарада тарафдорлари намойишида уларга куну-тун ишлаб, ўз давлатини бутун дунёга ўрнак қилишга ваъда берди.

“Мен қайси партияга овозини беришидан қатъий назар, сайловларга келиб, ўз бурчини адо этган ҳар бир фуқарога миннатдорлик билдираман. Барча номзодлар ва уларнинг ёрдамчиларига ҳам миннатдорлик билдираман. Биз халқдан кўрсатма олдик ва яқин орада барча камчиликларимизни тўғрилаймиз. Президент тизимига ўтишга тайёргарликни кўп жиҳатдан якунладик. Вазирлар ва маҳкама бўйича бир қарорга келгач, куну-тун ишлаб, барча мажбуриятларимизни бажариб, бутун дунёга ўрнак бўламиз”, деб айтган Эрдўған.

Аввалроқ ОАВда Эрдўғаннинг Истанбулдаги тарафдорлари намойиши вақтида бир бола Эрдўған қароргоҳи олдидаги автомобиллар учун автоматик тўсиқда оёғи тиқилиб қолгани маълум қилинганди.  

“Мен бу ерга эртароқ келардим, бироқ Истанбулда кичик бола билан бахтсиз воқеа юз берди. Мен уни шифохонага кўргани бордим ва у ҳақда шифокорлар билан гаплашгачгина Анқарага йўл олдим. Ҳозир болакай операция қилинмоқда, у 7 ёшда. Унинг соғайиб кетиши учун дуо қилинг”, деб айтган Эрдўған. 

Эрдўған шунингдек 2016 йилда мамлакатда юз берган давлат тўнтарувига уриниш воқеаларини ҳам эслаб ўтган. “Биз Туркияни тиз чўктирмоқчи бўлганларга қаршилик кўрсатдик. Анқара 16 июлда бомбардимон қилинганда сиз шу ерда бўлгансиз. Биз биргаликда давлатни исёнчилар панжасидан қутқардик. Улар қаерга қочиб кетдилар. Америкага. У ердаги сайловлар натижаларини кўзда кечирмоқдаман. Айнан у ердан мухолифатга кўп овоз берилган”, деб сўзларини давом эттирган Эрдўған. 

Эрдўған сайловларда демократия ва халқ истаги ғалаба қилганини қўшимча қилган. “Сиз тарихни ёзмоқдасиз, сизлардан миннатдорман”, деб ўз сўзларини якунлаган Эрдўған. 

Эрдўған президент сайловларида 52,6 фоиз овоз билан ғалаба қозонди. Унинг асосий рақиби Муҳаррам Инже 30,7 фоиз овоз тўплаган.

Парламент сайловларида Эрдўған етакчилик қилувчи ҳукмрон Адолат ва тараққиёт партияси 42,2 фоиз овоз билан ғалаба қилган. Бош мухолиф Халқ-республика партияси эса 22,7 фоиз овоз тзплаган.

Парламентга, шунингдек, курдларни қўллаб-қувватловчи Халқлар демократияси партияси 11,5 фоиз овоз билан ўтган.