Трамп Ким Чен Инни “буюк шахс”, Путинни “қаттиққўл” деб атади 

АҚШ президенти Дональд Трамп Daily Mail британ нашрига берган интервьюсида Шимолий Корея етакчиси Ким Чен Инни “жуда ақлли, қувноқ одам ва умуман олганда буюк шахс” деб атади.

“Мен у билан яхши чиқишиб олдим. У жуда ақлли, буюк шахс. У қувноқ ва қаттиққўл, яхши музокарачи”, деб айтган Трамп.

Трамп охирги 9 ой ичида Шимолий Кореяда на баллистик, на ядровий синов бўлганини айтган.

Трамп “Аввал душманлар деб қабул қилинган одамлар билан музокаралар олиб боришни “Трампнинг таълимоти” деб аташ мумкинми?” деган саволга тинчликни кўришни истаётганини, АҚШ урушлардан халос бўлаётгани ва улардан чиқаётганини айтган.

Трамп, шунингдек, интервьюсида Россия президенти Владимир Путинни “қаттиққўл”, Россияни эса рақиб деб ҳисоблашини, бироқ Москва билан чиқишиб олишига ишонишини айтган. 

“Қаранг, агар Россия билан келиша олсак – бу яхши. Мен уни (Путинни) танимайман. Мен у билан икки мартагина учрашганман”, деб айтган Трамп.

Трамп россиялик ҳамкасби билан чиқишиб кета олиши мумкинлигини айтган. “Кимдир “Сиз дўстмисиз ёки душманмисиз?” деб сўраганда, мен бу ҳақда ҳали гаплашишга жуда эрталигини айтгандим, ҳозир эса биз рақибмиз деб айтаман. Бироқ АҚШ учун ҳам, ростини айтганда, Буюк Британия ва бошқа давлатлар учун ҳам Россия, Хитой ва бошқа шундай давлатлар билан чиқиша олган яхшироқдир”, деб қўшимча қилган Трамп.

16 июлда Хельсинкида Трамп ва Путин ўртасида халқаро анжуманлар доирасидан ташқарида илк тўлиқ форматли учрашув бўлиб ўтади.