Рафаэль Маркес футболчилик фаолиятини якунлади. У жаҳон чемпионатлари рекордчиси сифатида кетди

Мексика терма жамоаси сардори Рафаэль Маркес 39 ёшида футболчилик фаолиятини якунлади. 

Ушбу футболчи Россияда бўлиб ўтган жаҳон чемпионатига ҳам терма жамоа билан келган ва 5та мундиалда терма жамоа билан сардор сифатида қатнашган футбол тарихидаги илк футболчига айланганди.

Футбол билан хайрлашгани ҳақида мексикалик футболчи ўз твиттерида маълум қилган.

Футболчи мухлисларга 21 йиллик профессионал фаолияти давомида қўллаб-қувватлаб келишгани учун миннатдорчилик билдирган. У хайрлашув хабарида ўзи ўйнаган клублардаги суратларини жамлаган.

У ўз фаолияти давомида «Атлас», «Монако», «Барселона», «Нью-Йорк Ред Булл», «Леон» ва «Верона» каби клубларда тўп сурган. Маркес фаолиятида жами 20 совринга эга чиққан, шундан 12таси «Барселона» билан қўлга киритилган (4 карра Испания чемпиони ва икки бор ЕЧЛ ғолиби). У «Монако» билан 1999/00 йилги мавсумда Франция чемпиони бўлган, Мексика терма жамоаси билан 1999 йилиги Конфедерациялар кубогида ғолиб чиққан, 2003 ва 2011 йилларда КОНКАКАФ кубогини қўлга киритган.

Эндиликда Маркес Мексиканинг «Атлас» клуби маъмуриятида иш бошлайди.