Ўзмиллийбанк Германиянинг Дойче банки билан 500 миллион евролик битимни имзолади

Германиянинг Франкфурт-Майн шаҳрида Ўзмиллийбанк Deutsche Bank AG билан 500 млн евро миқдорида инвестиция лойиҳаларини молиялаштириш бўйича битим имзолади.

Мазкур битим иқтисодиётнинг энергетика, транспорт, қишлоқ хўжалиги, тиббиёт, нефть-кимёси, инфратузилма, металлургия, авиация ва бошқа турли соҳаларида инвестиция лойиҳаларини молиялаштириш учун кредит линияларини ажратишни назарда тутади.

Битимнинг ўзига хослиги шундаки, турли давлатлардан, жумладан, АҚШ, Хитой, Корея, Япония, Германия, Франция, Италия ва Испаниядан ускуналар ҳамда технологиялар импорти учун узоқ муддатли молиялаштириш тақдим этилади.

Германия банклари билан ҳамкорликни кенгайтириш Ўзбекистон Республикаси президентининг 30.11.2017 йилдаги «Ўзбекистон Республикасининг Германия Федератив Республикаси билан икки томонлама ҳамкорлигини янада кенгайтириш чора-тадбирлари тўғрисида»ги ПҚ-3414-сонли қарори ижросини таъминлаш доирасида амалга оширилмоқда.

Бундан олдин Ўзмиллийбанк Германиянинг бошқа етакчи банклари билан, хусусан, Commerzbank AG ва AKA Bank билан ГФР ва Европа иттифоқи давлатларидан ускуна ҳамда технологиялар импорт қилишни ўз ичига олувчи кичик бизнес ва хусусий тадбиркорлик субъектлари учун кредит линияларини ажратиш, шунингдек инвестицион лойиҳаларни молиялаштириш бўйича битимлар имзолади.

Реклама ҳуқуқи асосида