Россия разведка бош бошқармаси собиқ полковниги Сергей Скрипаль ва унинг қизи Юлияни заҳарлашда иккита гуруҳ иштирок этган. Бу ҳақда терговчиларга таяниб Mirror нашри хабар берди.
Тахмин қилинишича, биринчи гуруҳ заҳарловчи моддани Буюк Британияга олиб келган, иккинчи гуруҳ эса заҳарлаш билан шуғулланган.
Июнь ойи охирида Эймсбери шаҳрида «Новичок» туридаги модда билан заҳарланган Чарли Роули Солсберидаги Елизавета паркидан топиб олган контейнерни атир деб ўйлаб Дон Стержессга совға қилганини айтган.
Британиялик Чарли Роули ва Дон Стержесс 30 июнь куни заҳарланган, Стержесс касалхонада вафот этган. Махсус хизматларнинг фикрича, улар Сергей Скрипаль ва унинг қизи Юлия март ойида заҳарланган моддадан заҳарланишган.
Расмий Лондон Скрипалларни заҳарлашда Москвани айблаган, Москва бу айбловни рад этиб келмоқда.
