Жазирама об-ҳаво туфайли Францияда АЭСнинг 4та энергия блоки иши тўхтатилди

Франциядаги ўта иссиқ об-ҳаво оқибатида Electricite de France (EDF) концерни атом станциясининг тўртта энергия блокини тўхтатишга мажбур бўлди. Бу ҳақида La Parisienne нашри хабар бермоқда.

Фассенхаймдаги АЭС-1 бугун маҳаллий вақт билан эрталаб соат 4:09да тўхтатилди. Асосий сабаблардан бири Элзас каналига чиқариладиган сув босимининг ошиб кетишидир. Халқаро стандартларга кўра, сувнинг ўртача ҳарорати 28 даража иссиқдан ошиб кетмаслиги керак. 

Бундан ташқари, шу ҳафта Сент-Албанада битта ва Бюжеда иккита АЭС энергия блоки фаолияти вақтинча тўхтатилди. Айнан Франция шарқидан бошланган жазирама об-ҳаво ўтган ҳафтадан буён ҳукмронлик қилиб келмоқда. Мамлакатнинг марказий ва жануби-шарқий ҳудудларида 40 даража иссиқ қайд этилди.