Ар-Риёд Қошиқчининг жасадини Туркияга бериши шарт - Эрдўған 

Туркия президенти Ражаб Эрдўған саудиялик журналист Жамол Қошиқчининг ўлдирилишини изоҳлади.

«Қошиқчи ўлдирилган ва бу очиқчасига тан олинди. Аммо унинг жасади қаерда? Саудия томони унинг жасадини Туркия томонига кўрсатиши шарт», - деди Эрдўған. 

«Агар Ар-Риёд саудиялик журналистнинг ўлимида гумонланаётганлигини олиб ташлашдан манфаатдор бўлса, у ҳолда мазкур иш бўйича Саудия Арабистонида ҳибсга олинган 18 киши устидан Истанбулда суд ўтказилишига розилик бериши керак. Агар Саудия томони улардан кўрсатма ола билмаса, уларни бизга топширсин», - деди Туркия президенти.

Эрдўған ҳибсга олинган 18 киши жиноят ижрочилари исмини билишларини айтди. Улардан бири қотил ҳисобланади. Ар-Риёд қотилларнинг туркияликлар орасидаги ёрдамчисини номини ҳам айтиши шарт, деди у.

«Туркияда Қошиқчи иши бўйича қўшимча маълумот ва ҳужжатлар мавжуд. Аммо бундай ишларда шошмашошарлик ярамайди», - деди Эрдўған.

Аввалроқ Эрдўған Саудия Арабистони бош прокурори мухолиф журналист Жамол Қошиқчининг ўлдирилишини тергов қилиш учун Туркияга ташриф буюришини маълум қилганди.