Самарқандда қутқарувчилар ёш боланинг қўлини асраб қолишди

30 октябрь куни Самарқанд вилоят Фавқулодда вазиятлар бошқармаси навбатчилик қисмига Самарқанд шаҳридаги 10-сон меҳрибонлик уйи тарбияланувчиси, 2006 йилда туғилган А.Ш.нинг чап қўли бармоғига темир болт тиқилиб қолганлиги, уни 8 соатдан буён чиқара олишмаётганлиги ҳақида хабар келиб тушади.

Воқеа жойига етиб борган вилоят ФВБ Қутқарув отряди боланинг бармоғида қон айланиш бузилганлиги, болт эса чиқмаётганлигига гувоҳ бўлишади.

— Болани зудлик билан Республика шошилинч тиббий ёрдам илмий маркази Самарқанд филиалига олиб бордик. Тиббиёт ходимлари яна бир оз вақт ўтганида, қон айланиши бузилгани учун боланинг бармоғини кесишга тўғри келишини айтишди, — дейди ФВБ ходими Ғ.Равшанов KUN.UZ мухбирига.

Шундан кейин тиббиёт ходимлари ва қутқарувчилар ҳамкорликда ҳаракат қилиб, боланинг бармоғидаги болтни махсус восита билан авайлаб кесиб олишган.