![](https://storage.kun.uz/source/3/0slTU1InXDNXBkwwo1HX10v3yJrhwqqf.jpg)
Тожикистон Миллий хавфсизлик давлат қўмитасининг расман маълум қилишича, Душанбедаги 201-Россия ҳарбий базаси комендатурасида ҳеч қандай теракт режалаштирилмаган. Бу ҳақда аввалроқ қатор оммавий ахборот воситалари хабар берганди.
«Биз 201-Россия ҳарбий базаси ёнида теракт содир этишга уринган радикаллар гуруҳи қўлга олингани ҳақидаги маълумотни рад этамиз. Бу маълумот нотўғри. Биз ҳеч кимни қўлга олмадик ҳамда ҳеч қандай терактга тайёргарлик кўрилмаган», - дея айтиб ўтди МХДҚ матбуот хизмати раҳбари Дилшод Абдуалимов «Азия-Плюс» нашрига.
ИШИД тарафдорлари 201-Россия ҳарбий базаси комендатураси ва Душанбедаги Россия мактабини портлатиб юбормоқчи бўлгани ҳақидаги маълумот 13 ноябрь куни эрталаб қатор ОАВ томонидан Тожикистон МХДҚдаги манбага асосан тарқатилди.
Маълумотларга кўра, 4 ноябрь куни 12 кишидан иборат гуруҳ қўлга олинган. Гуруҳ етакчиси Ваҳдат шаҳрида яшовчи Суҳроб исмли шахс бўлган. Қайд этилишича, у илгари Қирғизистон ва Эронда бўлган, кейин Туркия ҳудуди орқали Сурияга ўтиб, ИШИД сафида жанг қилган.